Тиббиёт ҳодимларига имтиёзлар бериш вақти келмади(ми)?

Фото: gazeta.uz

Бугун барчамиз шифокорларни, тиббиёт ҳодимларини кўкларга кўтаряпмиз, қаҳрамонлар деб “елкасига уриб” қўймоқдамиз. Қарсаклар чалиб олқишламоқдамиз, флэшмоблар уюштириб миннатдорчилик билдирмоқдамиз. Лекин эртага коронавирусдан тиббиёт ҳодимлари ёрдамида тўлиқ қутулганимиздан кейин барчаси унутилмасмикин? Қадимгилар айтганидек: “ишим битди, эшагим лойдан ўтди” қабилида иш тутилмасмикин? Юқоридаги каби саволлар ҳозирда барча тиббиёт ҳодимларининг ҳаёлидан ўтган бўлса ажабмас.

Бугунги кундаги критик вазият жамиятда кимнинг ҳақиқий ўрни қаердалигини кўрсатиб берди. Ҳарбийлар, ички ишлар ҳодимлари, Фавқулодда вазиятлар ҳодимлари билан бир қаторда тиббиёт ва санитария эпидемиологик осойишталик ҳодимлари (кейинги ўринларда шу икки касб эгаларини умумлаштириб тиббиёт ҳодимлари деб келтириб ўтамиз) энг муҳим, зарурий касб эгалари эканлиги яққол билиниб қолди. Жамиятимиз тиббиёт ҳодимлари қадрини эндиликда тушуниб етди. Ҳозирги қийин вазиятда кўзга кўринмас “душман” билан олдинги қаторларда курашаётган тиббиёт ҳодимларини халқимиз қўлдан келганча олқишлар, мақтовлар ва ширин сўзлар билан қўллаб қувватлашмоқда. Бунинг учун тиббиёт ҳодимлари номидан миннатдорчилик билдирамиз. Лекин шу нарсани таъкидлаш лозимки: қарсак, мақтов ёрлиқлари, ширин сўзлар, флэшмоблар билан “қорин тўйдириб бўлмаслиги”ни ҳаммамиз яхши тушунамиз.

Демак тиббиёт ҳодимларининг мавқеини бу каби маънавий қўллаб қувватлашлар билан бир қаторда моддий ва иқтисодий рағбатлантиришлар билан ошириш лозимлигини барчамиз бирдек хис этиб турибмиз. Бу ўринда президентимиз томонидан белгилаб берилган моддий рағбатлантиришлар учун алоҳида миннатдорчилик билдирамиз. Албатта шулар билан биргаликда тиббиёт ҳодимларини келгусида қўллаб – қувватлаш учун турли имтиёзлар бериш вақти келганини давр тақозо қилаётганини ҳам таъкидлашимиз керак.

Ташқи душмандан бизни ҳимоя қиладиган ҳарбийларимиз учун давлат томонидан бир қанча имтиёзлар берилиши, ички “душманлар” дан ҳимояловчи ички ишлар ҳодимларига берилаётган турли имтиёзлар шу касб эгаларининг ўз касбига садоқат билан ишлашига сабаб бўлмоқда. Лекин халқимизни кўзга кўринмас “душман”дан ўз жонини ҳавфга қўйиб ҳимоя қилаётган тиббиёт ҳодимларига ҳозирда юқоридаги касб эгаларига берилгани каби имтиёзлар жорий қилинмаган.

Мисол тариқасида олсак: ҳарбийларимиз фарзандлари ўқишга киришидаги имтиёзлар, нафақага чиқишидаги имтиёзлар, уй — жой олишда бериладиган имтиёзлар, жамоат транспортида, вилоятлараро  ҳаракатланишдаги имтиёзлар ва яна бир қанча имтиёзларни санаб ўтишимиз мумкин. Ички ишлар ҳодимларига ҳам ҳарбийлардан кам бўлмаган имтиёзларни давлатимиз томнидан тақдим этилаётгани ҳам таҳсинга сазовор. Ҳусусан, нафақага чиқишдаги имтиёзлар, хизмат уйлари, автомобиль сотиб олишда берилган имтиёзли кредитлар, фарзандларининг ўқишга киришида бериладиган имтиёзлар ва бошқа имтиёзларни мисол қилиб келтиришимиз мумкин. Халқимиз тинчлиги, осойишта хаётимиз йўлида хизмат қилаётган ички ишлар ҳодимларига ҳар қанча имтиёз берса ҳам кам.

Ички ишлар ҳодимлари ва ҳарбийлар билан бир сафда, қийин кунларда хизмат қилаётган тиббиёт ҳодимларига ҳам шу каби имтиёзлар бериш вақти етиб келмадимикин? Бирламчи бўғинда ҳизмат қилаётган (ҚВП, ҚОП) шифокорларимизга ўзи ишлаётган худудда ҳизмат уйи, ёки узоқ худуларга қатнаши учун шахсий автомобиль сотиб олишига имтиёзли кредит, тиббиёт ҳодимларини нафақага чиқишида имтиёзлар, уй – жой сотиб олишида турли имтиёзли кредитлар ва ниҳоят тиббиёт ҳодимларининг ойлик маошларини кўтариш бўйича қўшимча имкониятларни кўриб чиқиш вақти етиб келди деган фикрдамиз. Юқоридаги фикрларимизни ҳозирда шифокорларни қарсак, флэшмоб, шеър – у ашъорлар билан улуғлаётган фаолларимиз ҳам бир ўйлаб кўришларини сўрамоқчимиз. Ҳамкасбларимиздан юқоридаги фикрларимизни қўллаб — қувватлашларини, барча тиббиёт ҳодимларига етказишларини илтимос қиламиз!

Тиббиёт ҳодимларининг оғир меҳнатини қадрлаш, уларни мавқеини кўтариш, ҳурматини ошириш, уларни моддий ва маънавий қўллаб қувватлаш шу касбни танламоқчи бўлган ёшларимиз кўпайишига, фидокорона хизмат қилаётган тиббиёт ҳодимларини бунданда жонкуярлик билан ҳизмат қилишига, охир оқибат халқимиз саломатлиги, тиббий маданияти юксалишига олиб келади деган ўй – фикрлар билан ўз мактубимизни якунлаймиз.

Ҳурмат билан, бир гуруҳ шифокорлар.

Манба: Врачи Узбекистана

Бошқа тезкор хабарларни Телеграм каналимизда кузатиб боринг: @fargonashifokori

Дўстларингизга улашинг