Cемизлик бепуштликнинг сабабими?

6% ҳолатда семизлик бепуштликнинг сабаби бўлади. Тана вазни мейёрга қайтиши билан бу аёлларнинг тахминан 30% қисми қўшимча муолажаларсиз ҳомиладор бўлади.

Фото: klike.net

Ёғ тўқимаси ҳам эндокрин аъзо саналади. Бу ерда эстрогенлар ҳосил бўлади. Ёғ тўқимаси қалинлиги сабабли эстрогенлар миқдори ошиб боради. Бу эса доминант фолликуланинг ёрилмаслигига сабаб бўлади. Сариқ тана ҳосил бўлмай, етарли миқдорда прогестерон ишлаб чиқарилмаганлиги, тухум ҳужайра ажралиб чиқмаганлиги сабабли ҳомиладорлик бўлмайди.

Семизликда тана вазн индеки 30 дан кўп бўлади. Ортиқча вазн углеводларнинг нотўғри ўзлаштирилишига сабаб бўлиб, қандли диабет ривожланишига олиб келиши мумкин. Шунингдек, қон босими ошишига, юрак-қон томир касалликларига ҳам сабаб бўлади.

Бепуштликни даволашда ҳам семиз аёлларда стимуляцияга жавоб паст бўлади. Шунингдек биринчи триместрда ҳомиланинг йўқотилиши кўпроқ учрайди. Гестацион қандли диабет, қон босими ошиши, гестозлар ривожланиши юқори бўлади. Бачадон қисқариш кучи ўзгаришлари сабабли туғруқлар оператив йўл билан тугалланиш кўпроқ учрайди.

Бепуштликка кўп сабаб бўладиган тухумдонлар поликистози ҳам семизлик билан бирга кечади.

Эркакларда семизлик ривожланса, қонда эстрогенлар миқдори ортади. Бу эса сперматозоидлар миқдори ва сифатига таъсир қилади.

Х.Якубжонов,

шифокор

Янгиликларни Телеграм каналимизда кузатиб боринг: @fargonashifokori

Дўстларингизга улашинг