Бутунжаҳон саломатлик куни қандай нишонланмоқда?

Ҳар йили 7 апрель куни сайёрамизнинг барча мамлакатлари “Бутунжаҳон саломатлик куни”ни кенг нишонлайди. Маълумки, 1948 йил 7 апрель куни БМТнинг соғлиқни сақлаш соҳасидаги ихтисослашган агентлиги сифатида Жаҳон соғлиқни сақлаш ташкилоти Швейцариянинг Женева шаҳрида таъсис этилган. У ўз тасарруфидаги 6 та минтақавий ва 150 та мамлакатдаги ваколатхонаси орқали фаолият юритади.

Ўзбекистон 1992 йил 25 майда Жаҳон соғлиқни сақлаш ташкилотига қўшилган бўлиб, ушбу нуфузли халқаро ташкилот билан ҳамкорликда кўплаб муҳим лойиҳаларни амалга ошириб келмоқда. Жумладан, айни пайтда мамлакатимиз ушбу нуфузли халқаро ташкилот билан ҳамкорликда “Саломатлик-2020” дастурини ҳаётга татбиқ этиб бормоқда.

Ҳамкорликда яратилган бу дастур ҳар бир инсонни бутун ҳаёти давомида тиббий хизмат билан таъминлаш, унинг бу борадаги ҳуқуқ ва мажбуриятларини, имкониятларини кенгайтириш ҳамда тиббиёт тизимини такомиллаштириш, мамлакатнинг соғлиқни сақлаш соҳасидаги энг мураккаб муаммоларини ечиш, унинг барча инсонлар манфаатига жавоб беришини таъминлаш, соғлом инсон ва соғлом муҳитни яратишга кўмаклашиш вазифаларини ўз ичига олади.

Ушбу дастурга кўра, юқумсиз касалликлар турига киритилган диабет, саратон, юрак ва ўпка хасталиклари, тамаки ва спиртли ичимликлар истеъмол қилиш, нотўғри овқатланиш ва кам харакатланиш туфайли орттирилган касалликларни назорат қилиш ҳамда олдини олиш вазифаларини, шунингдек, юқумли ва хавфли касалликлар туркумидаги ОИТС, сил ва бошқа хавфли эпидемиологик касалликларнинг олдини олиш вазифалари кўзда тутилган.

Бу чора-тадбирлар жараёнида тизим моддий-техника базасини замонавий технологиялар асосида мустаҳкамлашга, барча лабораториялар ва бошқа тегишли тиббиёт пунктларини энг янги тиббий жиҳозлар билан таъминлашга ҳам алоҳида эътибор берилган.

Бугун “Бутунжаҳон саломатлик куни” ни нишонлаш ўзига хос, яъни ташвишли шароитда ўтмоқда. Бунга барчанинг ўринли хавотирига сабаб бўлган, Хитойнинг Ухан шаҳрида аниқланган ва кўрилган чораларга қарамай, бутун дунё бўйлаб жуда тез тарқалаётган “COVID-19” пандемияси ўз таъсирини кўрсатди.

Бугунги аҳвол ҳар бир фуқаро ва айниқса, тиббиёт ходимлари учун катта ва масъулиятли синовдир. Айни дамда “Бутунжаҳон саломатлик куни”ни яхши кайфият ва хурсандчилик билан нишонлаш ўрнига бутун инсониятга, шу қатори барча юртдошларимиз ҳаётига хавф солаётган короновирус пандемиясига шижоатли Президентимиз бошчилигида қарши кураш чора-тадбирлари олиб борилмоқда ва оғир натижаларнинг олдини олиш учун ҳаракат қилинмоқда.

Ишонаманки, бу – вақтинчалик ҳолат ва биз барчамиз ҳамжиҳатликда айтилаётган тавсиялар ва талабларга оғишмай риоя қилиб, бу оғир синовдан ўта оламиз.

Айтиш жоиз бўлса, келгуси ҳаёт учун чин маънодаги жанг майдонида кўринмас хавфли ёвга қарши ўз ҳаётларини хатарга қўйиб бўлса ҳам истиқболни ўйлаб, фидойилик билан кураш олиб бораётган тиббиёт ходимларига – жасоратли врачлар ва ҳамшираларга халқимиз номидан, келажакка умидвор ҳар бир фуқаро, болажонларимиз номидан самимий ташаккурлар изҳор этиб, улар жасорати олдида доим таъзимдамиз.

Бахтимизга соғ-омон бўлинглар, азиз шифокорлар, эл саломатлиги посбонлари! Юртимиз бу оғир синовлардан халқпарвар Президентимиз бошчилигида шараф билан ўтиб олишига умид ва ишонч билдириб, Яратгандан бу ишларда мададкор ва меҳрибон бўлишини тилаб қоламиз.

Янгиликларни Телеграм каналимизда кузатиб боринг: @fargonashifokori

Дўстларингизга улашинг