Туғруқ уйи фаолиятига эътибор янада кучайтирилади

“Фарғона ҳақиқати” газетасининг  2020 йил 13 мартдаги  21-сонида эълон қилинган «Шодлик ва қайғу оралиғида ёхуд туғруқ уйидаги муаммолар» сарлавҳали мақолада Қува тумани туғруқхонасидаги айрим муаммолар ҳақида сўз юритилган эди.

Мақолада билдирилган фикрлардан келиб чиқиб вилоят Соғлиқни сақлаш бошқармаси ва Қува туман тиббиёт бирлашмаси мутахассислари ҳамкорликда туғруқхона фаолиятини яна бир бор ўрганиб чиқдилар.

Маълумот учун айтиш зарурки, туғруқхона комплекси 128-ўринга мулжалланган бўлиб, қабулхона, туғруқ бўлими, туғруқдан кейинги бўлим, паталогия ва гинекология ҳамда жонлантириш бўлимлари туман аёлларига хизмат кўрсатиб келмоқда.

2019 йилнинг август, сентябрь ойиларида туғруқхона биносида жорий таъмирлаш ишлари амалга оширилиб, сув иситиш қозони ўрнатилди барча хоналарда иссиқ сув таъминоти йўлга қўйилган. Шунингдек, 2020 йилнинг  учинчи чорагида ҳам бу ерда яна жорий таъмирлаш ишлари амалга оширилиши режага киритилган. Оқава сув тизимини янгилаш учун смета ҳужжатлари тайёрланган бўлиб, бу ишнинг молиявий манбааси ҳам тасдиқланди.

Туғруқхона комплексида 0,5 лавозим бирлигида ультратовуш ускунасида ишловчи врач, тунги навбатчилик учун 2 лавозим бирлигида акушер-гинеколог, 1 лавозим бирлигида врач реаниматолог-анезтезиолог ҳамда врач неонатолог фаолият олиб бормоқда.

Туман тиббиёт бирлашмасида 2020 йилда бўлимларни дори-дармон билан таъминлаш мақсадида режа ишлаб чиқилган бўлиб, 306480,6 минг сўмлик смета тасдиқланган. Шунга асосан бўлимлардан ҳар ойлик талабнома асосида дори-дармон воситаси ва тиббий буюмлар таъминоти амалга ошириб борилади. Бўлимда вақтинчалик бўлмай қолган дори-воситалари эса айрим ҳолатларда Вазирлар Маҳкамасининг тегишли қарорига асосан беморларнинг яқинлари қўлига рецепт шаклида ёзиб берилиши мумкин.

Туғруқхона комплексида даволанаётган аёллар учун қулайлик яратиш мақсадида 2019 йил октябрь ойида 80 комплект, 2020 йил март ойида эса 120 коплект чойшаблар тўплами олиб келиб, хоналарга тарқатилган. Бу борада муаммо мавжуд эмас.

«Шодлик ва қайғу оралиғида ёхуд туғруқ уйидаги муаммолар» сарлавҳали мақоладан келиб чиқиб, туман тиббиёт бирлашмаси мутасаддилари томонидан туғруқхона комплекси ходимлари билан бирма-бир тахлил қилиб камчиликлари аниқ қилиб кўрсатиб берилди.

Бўлим бошлиғига мақолада келтирилган камчиликларни зудлик билан бартараф этиш ва келгусида ходимлар фаолияти устидан назоратни янада кучайтириши бўйича зарур топшириқ ва тавсиялар берилди, ижроси эса қатъий назоратга олинди.

Фарғона вилояти Соғлиқни сақлаш бошқармаси ахборот хизмати.

Янгиликларни Телеграм каналимизда кузатиб боринг: @fargonashifokori

Дўстларингизга улашинг