Коронавирус инфекциясининг олдини олишга хусусий тиббиёт муассасалари ҳам масъулми?

Фото: «Depositphotos»

Бугунги кунда коронавирус инфекцияси дунёнинг жуда кўп мамлакатларида қайд этилди. Афсуски, бу инфекция бизнинг юртимизни ҳам четлаб ўтгани йўқ.

Мамлакатимимиз ҳудудида коронавирус инфекцияси кенг тарқалиб кетишага йўл қўймаслик мақсадида Давлатимиз раҳбари бошчилигида барча зарур чора-тадбирлар кўрилмоқда. Шу мақсадда Бош вазир раҳбарлигида ҳукумат комиссия ҳам тузилган.

Фуқароларимиз хотиржам бўлишлари зарур. Чунки, коронавирус эпидемияси билан боғлиқ вазият Фарғона вилояти ҳокимлиги томонидан тузилган штаб томонидан ҳам сутканинг 24 соати давомида мунтазам назорат ва мониторинг қилиб борилмоқда.

Бу борада вилоят Соғлиқни сақлаш бошқармасида ҳам алоҳида штаб ташкил этилган бўлиб, вилоятимиздаги барча тиббиёт ходимлари якдил ва ҳамжиҳат бўлиб,  аҳоли ўртасида касалликнинг олдини олиш мақсадида кенг қамровли тушунтириш-профилактика ишларини олиб боришяпти.

Шу ўринда, айтиш лозимки, бу касалликнинг кенг тарқалишига йўл қўймаслик борасида нафақат давлат тиббиёт муассасалари, шу билан бирга, хусусий тиббиёт муассасалари ҳам бирдек масъул. Чунки айни пайтда мамлакатимиз, шу жумладан, Фарғона вилоятида ҳам хусусий тиббиёт масканлари кундан-кунга кўпайиб бормоқда.

Шу нақтаи назардан олиб қаралганда, ҳар қандай касаллик аломатлари сезилган беморлар давлат муассасасига келмай, хусусий клиникаларга бориши ҳам эҳтимолдан ҳоли эмас.

Соғлиқни сақлаш вазирлиги томонидан 2020 йил 9 март куни хусусий титббиёт муассасалари учун алоҳида кўрсатма хати чиқарилган бўлиб, унда коронавирус касаллигининг олдини олиш бўйича бир қатор аниқ вазифалар белгилаб қўйилган.

Масалан, хусусий тиббиёт муассасаларида ҳам давлат муассасаларида бўлгани каби назорат ишлари кучайтирилиши лозим. Муассасалардаги барча хоналар бир кунда 2 ёки 3 мартадан дизинфекцияланиши, ювиниш хонаси, ишхона ва ҳожатхоналарга алоҳида эътибор қаратилиши зарур.

Ҳар бир муассасада зарур ҳимоя воситалари бўлиши шарт. Агар мурожаат қилиб келувчи беморларда коронавирус касаллиги белгиларига ўхшаш белгилар, яъни қуруқ йўтал, тана ҳароратининг ошиши, нафас қисиши кузатилса ёки улар коранавирус касаллиги аниқланган беморлар билан яқин мулоқотда бўлгани аниқланса, дарҳол бу ҳақда соғлиқни сақлаш бошқармаси ҳамда санитария осойишталиги марказига хабар беришлари керак.

Бу эпидемия халқимиз бошига тушган бир синов. Уни енгиб ўтишда эгнига оқ халат кийган барча тиббиётчилар, у давлат муассасасида ишлайдими ёки хусусий тиббиёт масканидами бирдек масъулият билан ёндошиши, бир ёқадан бош чиқариши талаб этилади.

Агар биз якдил ва ҳамжиҳат ишласак, бу офат, албатта, жиловланади,  кенг тарқалишига йўл қўйилмайди.

Шу боис хусусий тиббиёт масканларида ишлаётган барча раҳбар ва ходимларни инфекциянинг олдини олишда фаолликка, ҳушёрликка чақирамиз!

У.Абдураҳмонов,

Фарғона вилояти соғлиқни сақлаш бошқармасининг лицензиялаш ва аккредитациялаш сектори бошлиғи.

 

Дўстларингизга улашинг: