Фарғонада таксичилар шифокорларни бепул манзилига етказмоқда

Ҳозирда аксарият юртдошларимиз ишхонага ёки бирор манзилга етиб олиш учун такси хизматидан фойдаланмоқда. Хўш, бугунги кунларда уларда хизмат кўрсатиш қандай? Таксичилар хизмат ҳақини ошириб юбормадими?

«Реал такси» бренди остида иш фаолиятини олиб борувчи «Водий Дархон транс» масъулияти чекланган жамияти янги акцияни бошлади.

Фарғона, Марғилон шаҳри, Олтиариқ ва Қува тумани бўйлаб барча шифокор ва ҳамшираларга уйдан ишхонага ва ишхонасидан уйигача бўлган масофада минимал тўловни ўз зиммасига олди. Эндиликда улар 3 километр ёки 5 минг сўмгача бўлган масофага бепул етказиб қўйилмоқда.

–Аҳоли орасида такси хизмати ошиб кетиши ҳақида турли хавотирлар бор, – дейди “Водий Дархон транс” масъулияти чекланган жамияти раҳбари Равшан Машарипов. – Биз минимал тарифларни янада арзонлаштириб, сифатли хизмат кўрсатишни асосий мақсад қилиб олганмиз. Бугун эса саломатлик посбонлари халқимиз саломатлиги йўлида астойдил меҳнат қилмоқда. Биз, уларни қўллаб-қувватлашга ҳаракат қиляпмиз.

Бундан ташқари, ҳозирги карантин туфайли фуқароларимиз кўчага чиқиши чекланганлиги туфайли кундалик ишлатиладиган барча зарур нарсаларни, яьни озиқ -овқат маҳсулотлари ёки дори-дармонларни уйигача олиб кириб бериш вазифасини арзон амалга оширяпмиз.

Шунингдек, жамиятга қарашли барча автомашиналар белгиланган вақт асосида дезинфекция қилинаётир.

М. Сулаймонов,

журналист

Дўстларингизга улашинг: