Туман тиббиёт бирлашмаси бошлиғи жаримага тортилди, аммо «дўкон ва ошхона қурилмоқда» деган иддао асоссиз

Фото: «ekologuz» канали

Ижтимоий тармоқларда эълон қилинган “Тез тиббий ёрдам бўлинмасидаги арчалар кесилмоқда» сарлавҳали маълумот юзасидан Бувайда тумани ҳокимлиги ахборот хизмати расмий муносабати билдирди.

Ушбу мақола юзасидан Бувайда тумани Тиббиёт бирлашмасида мутасадди ташкилотлар раҳбарлари ва мутахассислар ҳамкорлигида ўрганиш олиб борилди.

Ўрганишлар натижаси шуни кўрсатдики,  бирлашма бўлинмалари 14 та бинога жойлашган. Беморларга ва улар ҳолидан хабар олиш учун келган фуқароларга қулайлик яратиш мақсадида ҳар бир бинонинг олдига ёзги айвонча ва ўриндиқлар ўрнатиш режалаштирилган. Шу кунгача 5 та бино олдига ёзги айвонча қурилиб,  ишга туширилди. Жорий йил бошидан буён 12 та тепаси ёпиқ ўриндиқлар ўрнатилди.

Навбатда ёзги айвонча Туғруқхона ва Жонлантириш бўлинмаси оралиғига қурилиши режалаштирилган бўлиб,  қурилишга ҳалақит бераётган бир туп арча Тиббиёт бирлашмаси масъулларининг оғзаки буйруқларига асосан рухсатномасиз кесилган.

Туман экология ва атроф-муҳитни муҳофаза қилиш инпекцияси томонидан арчани рухсатномасиз  кесилишига йўл қўйган туман Тиббиёт бирлашмаси бошлиғи “Ўзбекистон Республикаси Маъмурий жавобгарлик тўғрисида”ги Кодекснинг 79-моддаси, 1-қисми билан айбдор деб топилиб, энг кам иш ҳақининг 10 баравари миқдорида жаримага тортилди, ҳамда «Ўсимлик дунёсини муҳофаза қилиш ва ундан фойдаланиш тўғрисида»ги Қонуннинг 37-моддаси, 2-банди талаби бузилган деб топилиб, 423 700 сўм зарар суммаси чиқарилди.

Маълумотдаги «дўкон ва ошхона қурилмоқда» деган иддао эса асоссиз.

Дўстларингизга улашинг: