Фарғонада яна бир шифокор калтакланди. Бу ҳолат қачонгача давом этади?

Фарғонада бемор қиз ва унинг онаси тиббиёт ходимларига тажовуз қилиб, ҳамширага жароҳат етказди.

2020 йил 28 январь куни Фарғона шаҳридаги 2-оилавий поликлиникада тиббиёт ходимларига тажовуз қилиш ҳолати юз берди. Бу ҳақда Фарғона вилояти соғлиқни сақлаш бошқармаси матбуот хизмати хабар берди.

Юзи қонга беланган ҳамширанинг аянчли ҳолати тасвирланган сурат тезда ижтимоий тармоқларга тарқалиб, кенг жамоатчиликнинг муҳокамасига сабаб бўляпти. Фарғона вилояти Соғлиқни сақлаш бошқармаси мутахассислари воқеани дарҳол ўргандилар.

Дастлабки ўрганишлардан маълум бўлишича, воқеа шу куни соат 14.30-15.00 лар атрофида ультратовуш текшируви (УТТ) ўтказиладиган хонада юз берган.

Ультратовуш текшируви ўтказувчи шифокор Машҳура Тошматова ва унга бириктирилган ҳамшира Матлуба Маъмурова одатдагидек беморларни навбат билан қабул қилишаётган эди.

– Фуқароларни навбат билан қабул қилиб текширувдан ўтказаётган эдик, – дейди шифокор Машҳура Тошматова. – Навбат 1992 йилда туғилган бир бемор қизга етиб келганида, у билан бирга хонага ёш бола кўтарган она ҳам кирди. Ёш болали аёл боласи касаллиги, инжиқлик қилиб тинимсиз йиғлаётгани, ташқарида ҳам 3 ёшли фарзанди совуқда изиллаб тургани, иккита бола билан қийналиб кетганини айтиб, навбатсиз кўрикдан ўтказиб қўйишни илтимос қилди. Шунда мен навбати етиб кирган қизга “Агар рози бўлсангиз шу болали аёлни сиздан олдин кўриб қўйсам”, деб рухсат сўрадим. Қиз эса таклифимга кўнмай, ўзининг касал эканини айтиб, навбатини бермади. Шу боис унинг ўзини текширишни бошладим. Шу жараёнда қизга ёш болали аёлга навбатини берса қанчалик савоб иш қилган бўлиши мумкинлигини тушунтириб насиҳат қилдим.

Маълум бўлишича, шифокор қизни пухта текширувдан ўтказиб, белгиланган тартибда ташхис қоғозини ёзиб беради. Қиз эса эшитган насиҳатдан асабийлашиб, хонадан чиқиб кетади. Кўп ўтмай хонага ёши катта бир аёл билан кириб келади. Аёл унинг онаси бўлиб, биргаликда тиббий кўрикдан ўтгани келишган экан.

Аёл УТТ хонасига кирибоқ “Нега қизимни ҳақорат қиласанлар?” деб бақира бошлайди. Тиббиёт ходимлари вазиятни ҳарчанд тушунтиришса ҳам, аёл уларни эшитмай УТТ шифокорига электр чойнакни отиб юборади. Шунда ҳамшира аёлни тинчлантирмоқчи бўлиб, унинг ёнига келганида жазавага тушган она ва бола ҳамширага очиқчасига тажовуз қилиб, қўли билан уриб, оёқлари билан тепиб тан жароҳати етказади.

Тўс-тўпалонни эшитиб бошқа ходимлар хонага чиқиб, она ва болани ташқарига базўр олиб чиқиб кетадилар. Поликлиника маъмурияти дарҳол тез тиббий ёрдам бўлимига, воқеа ҳақида профилактика инспекторига хабар беришди.

Тез ёрдам машинаси келиб, юзи қонга беланиб, хушидан кетган ҳамширани ўзига келтириб, биринчи ёрдам кўрсатгач, оғир ҳолатда Республика шошилинч тиббий ёрдам илмий маркази Фарғона филиалига олиб кетишади.

Филиалда беморни нейрохирург ва бошқа малакали мутахассислар иштирокида кўрикдан ўтказилиб, ёпиқ калла мия жароҳати, бош мия чайқалиши, бурун суяги синиши, бурундан қон кетиши ташхиси билан рўйхатга олиниб, марказнинг нейрохирургия бўлимига стационар даволаниш учун ётқизилди.

Ҳозирда беморга зарур даво муолажалари амалга оширилмоқда.

Ички ишлар органлари томонидан мазкур ҳолат бўйича зарур ҳужжатлар юритилиб, дастлабки суриштирув ишлари олиб борилмоқда.

Шуни қўшимча қилиш жоизки юқоридаги жанжалкаш она-болалар томонидан 2019 йил 18 январь куни Республика шошилинч тиббий ёрдам илмий маркази Фарғона филиали 3-тез тиббий ёрдами подстанцияси ҳамшираси Дилафрўз Бозоровага таҳдид қилган бўлиб, уларга нисбатан ҳеч қандай чора кўрилмаган эди.

Ўйлаймизки, бу сафар мазкур воқеага тез орада ҳуқуқий баҳо берилади.

Давлатимиз раҳбари парламентга мурожаатномасида ижтимоий тармоқларда тарқалаётган, шифокорларга нисбатан бўлаётган зўравонлик ҳолатларига алоҳида эътибор қаратиб, шифокорларнинг жамиятдаги ўрни ва мақомини кучайтириш, халқимиз ўртасида уларга нисбатан ҳурматни ошириш борасида аниқ вазифаларни белгилаб берди. Эндиликда уларга бўлаётган тажовузларга қонун йўли билан чек қўйиш вақти келди.

М. СУЛАЙМОНОВ,

журналист

Янгиликларни Телеграм каналимизда кузатиб боринг: @fargonashifokori

Дўстларингизга улашинг