Болаларга бепул тиббий хизмат кўрсатилиши шарт!

Фуқаролардан бири @sizdantelegram канали орқали Фарғона шаҳар болалар шифохонасида пулли тиббий хизмат кўрсатилгани  ва бунинг сабабини тушунмагани ҳақида мурожаат йўллаган бўлиб, мазкур мурожаат вилоят Соғлиқни сақлаш бошқармаси мутахассислари томонидан атрофлича ўрганиб чиқилди.

Маълум бўлишича, 2 январь куни шифохонага ҳақиқатан ҳам 70 нафардан зиёд фуқаро мурожаат қилган бўлиб, уларнинг 12 нафари даволаш учун ётқизилган. 16 нафар йўлланмасиз мурожаат қилган фуқарога пуллик тиббий хизмат кўрсатилган ва шифохона кассасига кирим қилинган.

Шу куни шифохонага мурожаат қилган Марғилон шаҳрида яшовчи А.А исмли фуқаро ҳам йўлланмасиз келгани боис амбулатор кўрикдан ўтканлиги учун 15 минг сўм тўлов қабул қилган.

Маълумки, Ўзбекистон Республикасида 18 ёшгача (17 йил 11 ой 29 кун) бўлган болаларга Ўзбекистон Республикаси Соғлиқни сақлаш вазирлиги тизимидаги барча муассасаларда тиббий ёрдам кўрсатиш бепул амалга оширилиши белгилаб қўйилган. Бу ҳақда Ўзбекистон Республикаси Соғлиқни сақлаш вазирлигининг 2013 йил 10 июлдаги 225-сонли буйруғи ҳам мавжуд.

Бироқ, Фарғона шаҳар болалар шифохонаси маъмурияти бу мезонларни бузиб, шифохонага йўлланмасиз келган беморларга пуллик хизмат кўрсатиш тартибини йўлга қўйган.

Шифохона маъмурияти бу борада Вазирлар Маҳкамасининг 2017 йил 5 сентябрдаги 696-сон қарори билан тасдиқланган Низомнинг 13-бандини ўзларича талқин қилишган. Вазирлар Маҳкамасининг мазкур қарорига  мувофиқ, ҳақиқатан ҳам агар мижоз тиббий ёрдам олиш учун тегишли йўлланмасиз (ордерсиз) тиббиёт ташкилотига бевосита мурожаат этса, тиббий ёрдам белгиланган тартибда пуллик асосда кўрсатилиши белгилаб қўйилган. Бироқ бу 18 ёшдан ошган катталар учун белгиланган мезон бўлиб, болалар шифохоналари қарорнинг бу бандини ўзларига татбиқ қилишлари мақсадга мувофиқ эмас.

Демак ўша куни шифокорлар жиддий хатога йўл қўйишган.

Вилоят соғлиқни сақлаш бошқармаси мутахассислари иштирокида  мазкур шифохонада йиғилиш ўтказилиб, мутасаддилар жиддий огоҳлантирилди. Келгусида шунга ўхшаш тушунмовчиликларнинг олдини олиш борасида зарур чора-тадбирлар белгилиб берилди.

Вилоят Cоғлиқни сақлаш бошқармаси ахборот хизмати

Дўстларингизга улашинг: