Энди чақалоқларга шахсий идентификация рақами берилади

Фото: BBC.com

Бу ҳақида Ўзбекистон Республикаси Президенти ҳузуридаги Лойиҳа бошқаруви миллий агентлиги ва унинг ҳузуридаги Электрон ҳукумат ва рақамли иқтисодиёт лойиҳаларини бошқариш марказининг матбуот анжуманида маълум қилинди.

– Ушбу тизим Эстония, Корея ва Сингапурда яхши самара бермоқда, –дейди Электрон ҳукумат ва рақамли иқтисодиёт лойиҳаларини бошқариш маркази директор ўринбосари Бахтиёр Ризаев. – Бунда ҳомиладор аёл оилавий шифохонада ҳисобга олинганда у ҳақидаги маълумотлар базаси яратилади ва туғруқхонада чақалоқ дарҳол ЖШШИР (жисмоний шахснинг шахсий идентификация рақами) генерация қилинади. У ота-онанинг ЖШШИРига электрон кўринишдаги туғилганлик тўғрисидаги гувоҳнома уланади.

Сўнгра, янги туғилган чақалоқнинг электрон тиббий картаси очилиб, илк эмлашлар тўғрисида маълумотлар киритилади. Шу асосда суюнчи пули автоматик равишда расмийлаштирилади, банкка мурожаат қилинганда нақд пул кўринишида ёки банк картасига ўтказиш йўли билан берилади. Шунингдек, болани автоматик тарзда болалар боғчасига навбатга қўйиш имкони ҳам яратилади.

Қисқаси бу усулнинг бир қатор афзаллиги бўлиб, аввало ортиқча қоғозбозликка барҳам берилади. Агарда эътибор қиладиган бўлсак, бу жараён бир мунча оворагарчиликлардан иборат. Туғруқхонадан олинган маълумотнома билан давлат хизматлари марказига бориб, туғилиш тўғрисидаги гувоҳномани олиш, туғруқхонага қайтиб, уни кўрсатгач, фарзандни уйга олиб кетиш мумкин. Кимгадир туғилганлик ҳақидаги гувоҳноманинг қоғоз шакли керак бўлса, уни истаган жойдан чиқариб олиши мумкин.

Бу масалани энг чекка ҳудудларда қандай ҳал қилиш борасидаги саволга мутахассислар айни вақтда Соғлиқни сақлаш вазирлиги туғруқхоналарни зарурий, замонавий жиҳозлар, хусусан чироқ ўчиб қолмаслиги учун генераторлар билан таъминлаш чорасини кўраётгани қайд этди. Шунингдек, mobil.uz мобиль оператори орқали сифатли интернет етказиб бериш борасида ҳам вазифалар белгиланган.

Матбуот анжуманида бу янгилик ҳудудларда электрон ҳукумат тизимини ривожлантириш борасидаги истиқболли чора-тадбирлардан бири экани, 2020 йилга мўлжалланган электрон ҳукумат тизимини янада ривожлантириш борасида сўз юритилди.

Унда интерактив давлат хизматларини кўрсатиш каналларини кенгайтириш, хусусан, коммунал хизмат кўрсатувчи ташкилотларнинг хизматларини “бир нуқтадан” туриб кўрсатувчи лойиҳани ишлаб чиқиш, унда истеъмолчилар билан электрон шаклдаги офертани қабул қилиш орқали шартнома тузиш, коммунал хизмат кўрсатувчи ташкилотларга кўчмас мулк объектига киритилган ва рўйхатдан ўтганлар сони бўйича ўзгаришлар билан боғлиқ маълумотларни онлайн тақдим этиш борасида маълумотлар берилди.

Янгиликларни Телеграм каналимизда кузатиб боринг: @fargonashifokori

Дўстларингизга улашинг