Қўқонда юқумли касалликлар шифохонаси фойдаланишга топширилди

Тиббиёт ходимлари куни байрами арафасида Қўқон шаҳрида 100 ўринли юқумли касалликлар шифохонаси қурилиб, фойдаланишга топширилди.

Фарғона вилояти ҳокимлигининг амалий кўмагида бунёд этилган мазкур шифо масканига маҳаллий бюджетдан 9,5 миллиард сўм маблағ сарф этилди. Ушбу маблағ ҳисобига илгари маънан эскириб, аянчли ҳолатга келиб қолган шифохона ўрнида янги типдаги бинолар қад ростлади. Жумладан, қабул бўлими, юқумли касалликларнинг ҳар бир турига мослаштирилган алоҳида-алоҳида даволаш бўлимлари, ошхона ва иситиш маркази  ташкил қилинди.

Бинонинг очилиш маросими катта тантанага айланиб кетди. Унда тиббиёт ходимлари, шаҳар жамоатчилиги ва оммавий ахборот воситалари вакиллари иштирок этди.

Тадбирда Фарғона вилояти Соғлиқни сақлаш бошқармаси бошлиғи Одилжон Умаров сўзга чиқиб, шифо масканининг янги биноси соҳа ходимларининг касб байрамига муносиб туҳфа бўлганини алоҳида таъкидлади ва уни бунёд этишда жонбозлик кўрсатган қурувчи ва бунёдкорларга миннатдорчилик билдирди.

–  Ушбу даво масканида Қўқон шаҳри ва атроф туманларидан беморлар келиб даволаниши учун мукаммал даражада шарт-шароит муҳайё қилинди, – дейди вилоят юқумли касалликлар шифохонаси бош врачи Султонали Боййигитов. –  Бундан биз шифокорлар ҳам, ҳудуд аҳолиси ҳам жуда ҳурсанд.  Яратиб берилган бундай қулайликларга жавобан янада самарали меҳнат қилиб, аҳоли саломатлигини тиклашга бор куч ва билимимизни сарф этишдан чарчамаймиз.

Вилоят соғлиқни сақлаш бошқармаси ахборот хизмати

Дўстларингизга улашинг: