“Тиббиёт: қуруқ ваъдалар қачонгача давом этади?” сарлавҳали мақолага расмий муносабат

2019 йил 4 ноябрь куни Ўзбекистон Миллий Ахборот агентлигининг UzA.uz сайтида Бағдод туманидаги собиқ “Каримбобо” қишлоқ врачлик пунктининг бугунги аҳволи хусусида сўз юритилган мақола эълон қилинди.

Материалда келтирилган далиллар шу куннинг ўзидаёқ Фарғона вилояти соғлиқни сақлаш бошқармаси, Ўзбекистон Республикаси Президентининг Бағдод туманидаги Халқ қабулхонаси ва туман Тиббиёт бирлашмаси мутасаддилари иштирокида жойига бориб ўрганилди.

Ўрганиш натижалари бўйича қуйидагилар маъмул қилинади.

Бағдод тумани Тиббиёт бирлашмаси тасарруфида 2017 йил 1 апрелга қадар 360 ўрин-жойли марказий шифохона, кўп тармоқли марказий поликлиника ва 21 та қишлоқ врачлик пункти аҳолига тиббий хизмат кўрсатиб келган.

Ўзбекистон Республикаси Президентининг 2017 йил 29 мартдаги “Ўзбекистон Республикасида бирламчи тиббий-санитария ёрдами муассасалари фаолиятини ташкил этишни янада такомиллаштириш чора-тадбирлари тўғрисида”ги ПҚ-2857-сонли Қарори асосида бирлашма таркибидаги 21 та ҚВПнинг 1 таси – “Мирзаобод” ҚВП фаолияти тугатилган, 4 та ҚВП сақлаб қолинган ва 16 та ҚВП негизида 7 та қишлоқ оилавий поликлиникаси – ҚОП ташкил этилган.

“Каримбобо” ҚВП ҳақиқатдан ҳам 1998 йилда фаолият бошлаган. 2017 йилда 5 минг 851 нафар аҳолига хизмат кўрсатган ва Президент қарорига кўра собиқ “Ўзбекистон” ҚВП негизида ташкилланган 7-сонли қишлоқ оилавий поликлиникасига бириктирилган. “Каримбобо” ҚВП биносида эса аҳолига қулайлик яратиш мақсадида  “Шифокорлар хизмат уйи” ташкил қилинган.

Ўзбекистон Республикаси Соғлиқни сақлаш вазирлиги (2017 йил 24 июлдаги №06-3/448-сонли), Меҳнат бандлиги вазирлиги (2017 йил 24 июлдаги №01-09/3300-сонли) ва Молия вазирлиги (2017 йил 24 июлдаги БХ/12-03-32-12-сонли) томонидан тасдиқланган “Бирламчи тиббий санитария ёрдами муассасаларининг вақтинчалик штат меъёрлари”да қисқартирилган (ёки шифокорлар уйига айлантирилган) бинолардан даволаш-профилактика муассасаси сифатида фойдаланиш назарда тутилмаганлиги сабабли собиқ “Каримбобо” ҚВП учун алоҳида штат бирлиги ҳам, бинони таъмирлашга ҳам маблағ ажратилмаган.

Шундай бўлса-да, 2017 йилда “Шифокорлар уйи” маҳаллий бюджет маблағлари ҳисобидан таъмирланган. Мақолада таъкидланганидек, бу ерда қаровул штати чиндан ҳам йўқ. Сабаби, бундай штат фақатгина 7-сонли қишлоқ оилавий поликлиникаси учун ажратилган, холос.

Туман Тиббиёт бирлашмаси маъмурияти қишлоқ оилавий поликлиникасигача бўлган масофанинг узоқлигини  инобатга олиб, ички имкониятлардан келиб чиққан ҳолда, собиқ “Каримбобо” ҚВП биносида умумий амалиёт шифокорининг беморлар қабулини йўлга қўйган ва патронаж ҳамширалар томонидан беморлар тиббий ҳужжатларининг сақланиши ва юритилиши мақсадида фойдаланиб келинмоқда. Бино 2020 йилда маҳаллий бюджет маблағлари ҳисобидан  мукаммал таъмирланиши режалаштирилган ва бунга 450 млн. сўм ажратилиши кўзда тутилмоқда.

Мақолада “7-сонли ҚОПда мутахахассислар етишмаслиги сабабли, қишлоқ аҳолиси бу муассасага мурожаат қилмай қўйгани, қўшни Бувайда туманига қатнашга мажбур бўлаётгани” ёзилади. Лекин ўрганиш куни соат 16:15 да бу ерда беморларнинг кўплиги, врачлар қабули эса ҳамон давом этаётгани аниқланди.

Собиқ “Каримбобо” ҚВП биносининг иситиш тизими ўтган 2018 йилда таъмирланмаган ва ишлатилмаган. Жорий йилда эса муассаса иситиш тизими учун маҳаллий бюджетдан 4 млн. сўм маблағ ажратилиб, бу борадаги муаммолар тўлиқ бартараф этилган. Ўрганиш давомида куз-қиш мавсуми бошидан буён иситиш тизими бир меъёрда ишлаётгани, хоналар ҳарорати белгиланган даражадан паст эмаслиги аниқланди.

Шу ўринда алоҳида таъкидлаш лозимки, мақола муаллифи баъзи ўринларда фақатгина бир томонлама мулоҳаза юритган. Аслида муаллиф мазкур материални тайёрлашда Фарғона вилояти Соғлиқни сақлаш бошқармаси ва Бағдод туман ҳокимлиги мутасаддиларининг фикри билан ҳам қизиқиб кўрганида холислик мезонлари таъминланган бўларди.

Фарғона вилояти Соғлиқни сақлаш бошқармаси ахборот хизмати

Дўстларингизга улашинг: