Туғма юрак нуқсонига эга 12 нафар ўзбекистонлик бола операция қилинди

Юрак нуқсони билан туғилган ўзбекистонлик 12 нафар бола француз кардиожарроҳлари томонидан операция қилинди. Операциялар “Sen Yolg‘iz Emassan” Фонди ва “Умид ришталари” (La Chaîne de l’Espoir) француз шифокорлари уюшмаси ҳамкорлигида Тошкентда ташкил этилган хайрия акцияси доирасида ўтказилди.

Фото: Karimov Foundation

“Sen Yolg‘iz Emassan” Фонди ўз фаолиятида меҳрибонлик уйлари тарбияланувчилари ва ижтимоий кўмакка муҳтож оилалар фарзандларига тиббий ёрдам кўрсатишга алоҳида эътибор қаратади. Фонд жорий йил ёзда мамлакатимиздаги болалар ва меҳрибонлик уйлари тарбияланувчиларини туғма юрак нуқсонини аниқлаш бўйича навбатдаги кўрикдан ўтказди. Кўрик жараёнида 15 нафар болада туғма юрак хасталиклари аниқланди.

Фонд таклифи билан Франциянинг етакчи кардиожарроҳлари бемор болаларни ҳар томонлама текшириш ва муолажанинг кейинги чораларини аниқлаш мақсадида Тошкентга келдилар.

Меҳрибонлик уйлари ва эҳтиёжманд оилалардан бўлган 80 дан ортиқ болажонлар диагностик текширувлардан ўтди. Франциялик шифокорлар оғир ташхис қўйилган 12 нафар болани операция қилдилар. Операция қилинган болалар орасида уч кунлик гўдак ҳам бор эди. Ҳозирда болалар шифокорлар назоратида.

“Sen Yolg‘iz Emassan” Фондининг молиявий кўмаги билан шу кунга қадар франциялик кардиожарроҳлар томонидан ўзбекистонлик эҳтиёжманд оилалар фарзандлари ва меҳрибонлик уйлари тарбияланувчиларига 120 дан ортиқ мураккаб юрак операциялари ўтказилди. Мураккаб амалиётларнинг 21 таси Франциянинг Нант шаҳридаги клиникада амалга оширилди.

Дўстларингизга улашинг: