Патронаж ишлари талаб даражасидами?

Ҳозирги кунда қишлоқ врачлик пунктлари ва қишлоқ оилавий поликлиникалари фаолиятини яхшилаш орқали бирламчи тиббий-санитария ёрдамини кўрсатиш тизимини такомиллаштириш ҳамда аҳолининг ушбу хизматлардан фойдаланиш имкониятини кенгайтиришга қаратилмоқда. Аммо мазкур соҳада ютуқлар билан биргаликда, муаммолар ҳам етарлича сақланиб қолмоқда.

Олий Мажлис Қонунчилик палатасидаги “Адолат” СДП фракцияси ташкил этган “Шифокорлар ва патронаж ҳамширалар томонидан ўтказилаётган режали патронаж ишлари: муаммо ва ечимлар” мавзусидаги давра суҳбатида ана шундай муаммоларни бартараф этиш, тиббиёт соҳасидаги ислоҳотларни янада чуқурлаштириш масалалари атрофлича муҳокама этилди. Бу ҳақда УзА хабар берди.

– Бугунги кунда туман, шаҳар кўп тармоқли марказий поликлиникалар, шаҳар ва қишлоқ оилавий поликлиникалар, қишлоқ врачлик пунктларида тиббий патронажлар сифатида умумий амалиёт шифокорлар, патронаж ҳамширалар ва зарур ҳолатларда тор мутахассислар қўшимча жалб қилинмоқда, – деди Аҳолининг соғлом турмуш тарзини қўллаб-қувватлаш ва жисмоний фаоллигини ошириш маркази директори Барно Одилова. – Аммо патронаж ва умумий амалиёт шифокори, ҳамшира фаолияти тўлиқ манзилли амалга ошириляпти ва у ўз самарасини беряпти, дея олмаймиз. Ушбу соҳада ҳам ечимини кутаётган бир қатор масалалар мавжуд.

Мутахассиснинг таъкидлашича, уй хўжаликларининг тиббий ижтимоий ҳолатини ўрганиш мақсадида патронаж ҳамшира ойига 144 та хонадонга бориши белгиланган. Бу эса, кунига 6 та хонадонни ташкил этиб, натижада айрим аҳволи оғир беморлар ҳолидан хабар олиш имконияти камайишига сабаб бўлмоқда. Бунда айрим ҳудудларда аҳоли бир-биридан узоқ жойларда яшаши ҳам инобатга олиниши керак.

Шуларни инобатга олиб, фракция депутатлари шифокорлар ва патронаж ҳамширалар томонидан ўтказилаётган режали патронаж ишларини қайта кўриб чиқиш, уларни замон талабига мослаштириш, эркин фаолиятини амалга оширишига замин яратиш зарурлигини таъкидлади. Айни пайтда патронаж ҳамшираси томонидан тизимли патронаж хизмати билан аҳолини қамраб олиниши лозим бўлган контингентни ва хизмат кўрсатиш даврийлигини аниқ белгилаш таклифи илгари сурилди. Шунингдек, умумий амалиёт шифокори томонидан хонадонга ташрифлар режаси ва даврийлигини ҳам кўриб чиқиш мақсадга мувофиқлиги қайд этилди.

Ушбу соҳага эътибор кучайганини инобатга олиб, патронаж ҳамшираси ва шифокор юкламаларини қайта кўриб чиқиш долзарб вазифалардан саналади.

Қишлоқ оилавий поликлиникалари ва қишлоқ врачлик пунктлари патронаж ҳамшираларининг йўл харажатларини тайинлаш ва тўлаш тартиби тўғрисидаги Низом ишлаб чиқилди, Молия ҳамда Бандлик ва меҳнат муносабатлари вазирликлари билан қўшма қарор жорий йилнинг 24 майида тасдиқланди. Патронаж ҳамшираларига хизмат радиуси 10 километр ва ундан узоқ бўлса, эгаллаб турган лавозимига кўра, иш ҳақининг энг кам миқдорида компенсация тўланади. Агарда масофа 10 километрдан кам бўлса, компенсация тўланмайди. Йўл ҳақи компенсациясини хизмат радиуси 5 километр ва ундан ортиқ масофага белгилаш ёки такомиллашган сетка орқали тўлаш зарур.

Давра суҳбатида Патронаж ҳамширага 0,75 ставкадан кам иш ҳажми ажратмаслик, 1 умумий амалиёт шифокорига 2000 нафар аҳоли бириктириш ва унга 4 ҳамшира ажратиш каби таклифлар айтилди.

Дўстларингизга улашинг: