Тўмариснинг жажжигина юрагига амалга оширилган операция 7,5 соат давом этди

Ўша вақтда у ҳали 2 ойлик чақалоқ эди.

Фото: “Sen Yolg’iz Emassan” Фонди

Операцияни “Sen Yolg’iz Emassan” Фонди таклифи билан Тошкентга ташриф буюрган машҳур француз кардиожарроҳи Оливье Барон бажарди.

“Қизимизга қуйилган юрак нуқсони ташҳиси биз учун умуман кутилмаган ҳол бўлди. Шифокорлар боланинг ҳаётини сақлаб қолиш учун зудлик билан операция қилиш зарурлигини, бундай мураккаб операциялар фақат чет элда қилинишини айтди, – дея эслайди Тўмариснинг ойиси Зарнигор. – Турмуш ўртоғим кунбай ишлаб рўзғор тебратади, мен уй бекасиман. Етарли маблағимиз йўқ эди. Шунда биз Интернетдан ёрдам излаб кўришга ҳаракат қилиб, Лола Каримова-Тилляеванинг “Sen Yolg’iz Emassan” Фонди ҳақида маълумот топдик. Биз тезда Ғиждувондан Тошкентга келиб, барча зарур ҳужжатларни топширдик. Қизимизнинг тузалиб кетишига умид уйғонган эди”.

Тумариснинг юраги 2016 йилнинг сентябр ойида операция қилинди.
“Куз ёши тўкишга ҳаққим йўқ, чунки қизим тирик, деб ўзимга қайта-қайта айтар эдим. Жуда узоқ давом этган операция пайти ҳам ўзимга шу сўзларни такрорлайвердим”, – дейди Зарнигор.
Бугун Тумарис 3 ёшда. У жуда қувноқ қизалоқ бўлиб ўсяпти, яқинда боғчага қатнай бошлайди.
“Сўз билан айтиб бўлмайди бизнинг Лола Исломовнага ва Фондга бўлган миннатдорлигимизни. Улар бизга умидимиз, ҳаётимиз, қизимизни қайтариб беришди…”, – дейди Тумариснинг ойиси.

«Sen Yolg’iz Emassan» Фондининг молиявий кўмаги билан 2015 йилдан бери франциялик кардиожарроҳлар томонидан ўзбекистонлик кам таъминланган оила фарзандлари ва Меҳрибонлик уйи тарбияланувчиларига 110 дан ортиқ мураккаб юрак операциялари бажарилди, улардан 20таси Франциянинг Нант шаҳридаги клиникада амалга оширилди.

Дўстларингизга улашинг: