Фарғонада туғилган уч эгизак ҳақида

Бола – инсон ҳаётининг қувончи ва мазмунидир. Шу боис қайсики оилада фарзанд туғилса, ўша хонадонда бамисоли тўй бўлиб кетади. Ёши улуғларимиз “Умри-ризқи билан берган бўлсин, ота-онасига йўлдошу, эл ардоғидаги инсон бўлиб етишсин” дея дуога қўл очишади.

Фарғона шаҳрининг “Гулзор” маҳалласида истиқомат қилувчи Алишер Рўзиматов ва Феруза Мадалиевалар хонадонида ҳам худди шундай бўлди. Яъни шу йилнинг 1 май куни хонадон соҳибларининг ўғли Исломжон Исроилов ва келини Дилоромхон Исроиловалар 3 эгизак фарзанд кўришди. Энг эътиборлиси, чақалоқларга Ўзбекистон Республикаси Президенти Шавкат Мирзиёев, у кишининг рафиқаси Зироатхон Мирзиёева ва қизи Саида Мирзиёевалар шарафига Шавкатжон, Зироатхон ва Саидахон дея исм қўйишди.

Буни қарангки, кичкинтойларнинг дадаси Исломжон Исроилов 1994 йил 1 сентябрда – Мустақиллигимизнинг 3 йиллик байрами куни туғилгани сабабли мамлакатимизнинг биринчи Президенти Ислом Каримов шарафига Исломжон деб исм қўйишган экан. Мана, орадан чорак аср вақт ўтиб, Исломжон бир эмас, 3 нафар фарзанднинг отасига айланди.

-Ўзим шифокор бўлганим боис ширинтойларимнинг соғлиғидан эрта-ю кеч бохабар бўлиб тураман. Халқимизда “чилла” деган ажойиб удум бор. Бинобарин, ҳозир қудажоним Муҳаррамхон Мирзаеваникида чилла сақлашяпти,-дейди эгизакларнинг севимли бувижониси, Фарғона шаҳридаги 5-сонли оилавий поликлиника бош шифокори,  Феруза Мадалиева.

-Ўғлим Исломжон тадбиркорлик фаолияти билан шуғулланади. Шу боис набираларим туғилган куни у Россияда, хизмат сафарида эди. Ўша ердан туриб, дадаси иккимизга қўнғироқ қилди. “Якшанба куни бозорга чиқиб, чиройли автомашина танлаб туринглар. Келинингиз ва набираларингизни кўргани ана шу машинада бормоқчиман” деб илтимос қилди. Аммо 5 май куни пойтахтдан келган вакиллар бизга “Президент совғаси” – “Кобальт” автомашинасини топшириб кетишди. Эртаси куни – 6 май куни эса вилоятимизга ташрифи чоғида Юртбошимиз билан учрашиш бахтига муяссар бўлдим. Ишонасизми, бундай қўшалоқ хурсандчилик тушимга ҳам кирган эмас. Эндиги ниятимиз – кичкинтойларни эл-юрт равнақига камарбаста, фидоий инсонлар қилиб тарбиялаш,-дея сўзини давом эттирди Ф.Мадалиева мамнун бўлиб.

Муқимжон ҚОДИРОВ

Дўстларингизга улашинг: