Фарғонада туғилган уч эгизакка Шавкатжон, Зироатхон ва Саидахон исмлари қўйилди

Фарғона шаҳар тиббиёт бирлашмасининг туғруқхона мажмуасида 1 май куни соат 00:40 да уч эгизак чақалоқ дунёга келди.

Исломжон ва Дилоромхон Исроиловлар оиласида туғилган чақалоқларга Ўзбекистон Президенти ва унинг оиласи шарафига исмлар танланган. Эгизакларга Шавкатжон (Ўзбекистон Президенти Шавкат Мирзиёев шарафига), Зироатхон (Ўзбекистон Президентининг рафиқаси Зироатхон Мирзиёева шарафига) ва Саидахон (Ўзбекистон Президентининг катта қизи Саида Мирзиёева шарафига) деб исм қўйилган.

Шифокорларнинг маълум қилишича, туғилган бир ўғил ва икки қизнинг аҳволи яхши, онанинг аҳволи ҳам жойида. Шавкатжон 1 кг 944 грамм, Зироатхон 1 кг 972 грамм, Саидахон эса 1 кг 888 грамм вазнда туғилган.

Яна бир қизиқ маълумот, уч эгизакнинг отаси 1994 йил 1 сентябрь куни — Ўзбекистон мустақиллигига уч йил тўлган кунда дунёга келган ва унга Ўзбекистон биринчи Президенти Ислом Каримов шарафига Исломжон деб исм қўйишган экан.

Азизжон Эрматов,

журналист

Дўстларингизга улашинг: