Тиббиёт тизимида коррупцион ҳолатларнинг сабаблари нимада?

Парламент қуйи палатасида Коррупцияга қарши курашиш ва суд-ҳуқуқ масалалари қўмитасининг ўрганиш натижалари муҳокамасига бағишланган йиғилиши бўлиб ўтди. 
Олий Мажлис Қонунчилик палатасида Коррупцияга қарши курашиш ва суд-ҳуқуқ масалалари қўмитаси томонидан охирги икки ой мобайнида жойларда аҳолига кўрсатилаётган тиббий-санитария ёрдами сифати ва самарадорлигини ошириш борасида амалга оширилаётган ишлар ҳолати бўйича ўрганиш натижалари муҳокамасига бағишланган йиғилиш ўтказилди.
Ўрганишлар натижалари давлат даволаш-профилактика муассасалари ходимлари маъмурий жазога тортилиши ҳолатлари кўпайиб бораётганини кўрсатмоқда. Бунинг сабаблари Олий Мажлис Қонунчилик палатаси ва парламент ҳузуридаги Қонунчилик муаммолари ва парламент тадқиқотлари институти билан биргаликда олиб борилган таҳлилларда яққол намоён бўлди.
Унга кўра, ҳали бошқа соҳалардаги каби тиббиёт тизимида ҳам коррупцион ҳолатлар, қонунчилик ҳужжатларида эса, коррупцияга йўл очувчи элементлар мавжудлигидир. Биргина мисол. Давлат санитария-эпидемиология назорати марказлари (ДСЭНМ) ходимлари бир масалага икки хил ёндашмоқда.
Маъмурий жавобгарлик тўғрисидаги кодексда ҳуқуқбузарликнинг белгилари етарли даражада очиб берилмагани, ҳуқуқни қўлловчи, яъни ДСЭНМ мансабдор шахслари томонидан уни ўзича талқин қилинишига ва қонунчиликнинг инсонпарварлик ва одиллик принципларига зид равишда жарима жазоси қўлланишига йўл очмоқда.
Ўз ўрнида, бу ҳолат давлат муассасаларида ишлаётган тиббиёт ходимларининг ҳуқуқ ва манфаатларини тўлақонли ҳимоя қила олмаяпти, ижтимоий адолат мезонларига путур етказмоқда. Ҳолбуки, бугунги кунда бу каби бир масалага икки хил ёндашиш ҳолатларига, субъектив ва идоравий манфаатнинг устуворлик касб этишига йўл қўйиб бўлмайди.
Шу билан бирга, бу тоифадаги маъмурий жазолар суд эмас, ДСЭНМ мансабдор шахслари томонидан қўлланади. Жарималардан тушувчи маблағлар тўлиқ мазкур органларнинг махсус ҳисоб варақасида жамланиб, уларнинг 15 фоизи ДСЭНМ ходимларини моддий рағбатлантиришга йўналтирилиши эса, ДСЭНМ мансабдор шахсларининг маъмурий жарима жазосини қўллашдан манфаатдор бўлишига олиб келмоқда.
Амалдаги санитария қонун ҳужжатларини, санитария нормалари, қоидалари ва гигиена нормативларини танқидий қайта кўриб чиқиш, Маъмурий жавобгарлик тўғрисидаги кодекснинг тегишли моддалари диспозициясини ўзгартириш асосида давлат санитария назоратини амалга ошириш тартибини такомиллаштириш, ҳуқуқий таъсир чорасини ҳуқуқбузарликнинг оқибатларига номутаносиб равишда қўллашнинг олдини олишга қаратилган таклифларни ишлаб чиқишга келишиб олинди.
Йиғилишда қўмитанинг тегишли қарори қабул қилинди.
 Нурилло Насриев, ЎзА

Дўстларингизга улашинг: