Халқ табобати хизмати учун қандай воситалар зарур?

Ўзбекистон Республикаси Соғлиқни сақлаш вазирлигининг буйруғи билан “Халқ табобати” тиббий ихтисослашувининг тури бўйича фаолиятни амалга ошириш учун зарур бўлган моддий-техник база, асбоб-ускуналар ва бошқа техник воситалар, шу жумладан, тиббий техникага энг кам талаблар тасдиқланди. Бу буйруқ 2018 йилнинг 6 декабр куни Адлия вазирлигида 2905-2 рақам билан рўйхатга олинди.

Эслатиб ўтамиз, Президентнинг 2018 йил 12 октябрдаги “Ўзбекистон Республикасида халқ табобати соҳасини тартибга солиш чора-тадбирлари тўғрисида”ги қарори билан халқ табобати тиббий ёрдам кўрсатишнинг қўшимча усули сифатида эътироф этилганди.Бундай хизматлар тиббий фаолиятни лицензиялаш учун белгиланган тартибда лицензияланади. Бироқ тиббий таълим маълумоти мавжудлиги талаб қилинмайди.

Лицензия олиш учун шартлардан бири – муассаса моддий-техник базасининг энг кам талабларга жавоб бериши ҳисобланади. Вазир буйруғи билан халқ табобатининг ҳам стационар, ҳам амбулатор ташкилотлари учун қуйидаги 8 та зарур нарса рўйхати тасдиқланди:

-стерил тиббиёт ускуналари учун стол;

-Халқ табобати вакили учун иш столи;

-стуллар;

-кушетка;

-муолажа хонасида стационар ҳолатдаги бактериоцид лампа;

-стериллаш ва дистиллаш учун мўлжалланган тиббиёт асбоб-ускуналари ёки стерилизацияни ўтказиш учун имзоланган шартнома (фаолиятида инвазив муолажалар мавжуд бўлганда);

-тонометр ва фонедоскоп;

-тиббиёт термометри.

Ҳужжат жорий йилнинг 7 мартидан кучга кирди.

Дўстларингизга улашинг: