Фарғонада “Бир умрга ёрқин табассум” дастури иш бошлади

Ўзбекистон стоматологлар уюшмасидан «COLGATE» компанияси кўмагида Тошкент тиббиёт академияси Фарғона филиалида “Бир умрга ёрқин табассум” стоматологик касалликлар профилактикасини тарғиб этиш дастури иш бошлади.

Фото: Edu.uz

Дастур болаларда ёшлик даврдан бошлаб оғиз бўшлиғини тўғри парвариш қилиш борасида мустаҳкам кўникма ҳосил қилиш ҳамда стоматологик касалликларнинг олдини олишга қаратилган тадбирлар мажмуидан иборатдир.

Аслида ўғил-қизларимиз саломатлигини асраб-авайлаш оддий қоидалар, амалларимиздан бошланади. Масалан, фарзандимиздан ҳеч бўлмаса ойда бир маротаба: “Оғзингни очгин-чи, тишларинг қай ҳолатда?”, “Тишларингни қачон ва қандай юваяпсан?” дея сўраб кўрамизми? Афсуски, аксариятимиз бу билан қизиқмаймиз. Дилбандимиз тишларидаги ўзгаришлар, дейлик, оқ доғларнинг пайдо бўлишига ёки аҳамият бермаймиз ёхуд стоматологик билимга эга бўлмаганимиз боис бундай нуқталар касалликнинг дастлабки аломатлари эканини фарқлай олмаймиз. Қачонки уларнинг тишлари қорайиб емирила бошласа ёки оғриқ безовта қилсагина шифокор ҳузурига шошиламиз.

Филиалнинг 114 нафар талабаларини дастур кординаторлари Елена Тамазова ва Ҳилола Раҳмибердиевалар семинар-тренинг орқали ўқитдилар. 

– Лойиҳа давомида шаҳримиз мактабларининг 20 мингдан ортиқ  бошланғич синф ўқувчиларига гигиеник тарбия комплекс дарслари ўтказилиб, ҳар бир болага тиш чўткаси, тиш пастаси, тиш тозалаш жадвали ҳамда ота-оналар учун эслатма флаерлари тарқатилади, – дейди Тошкент тиббиёт академияси Фарғона филиали матбуот котиби Сайёра Исмоилова. – Етти, ўн ёшдаги болаларга мўлжалланган ушбу дастур стоматологлар, стоматологик-гигиеначилар ва ўқитувчиларнинг мактаб болаларига оғиз бўшлиғини парвариш қилиш қоидаларини ўргатиш жараёнини ташкиллаштиришда яхши самара берада.

Дастур жорий йилнинг 19 мартга қадар давом этади.

Бошқа тезкор хабарларни Телеграм каналимизда кузатиб боринг: @fargonashifokori

Дўстларингизга улашинг