Қувада замонавий клиника

Қува туманида “Med doctor Arslonov” тиббий диагностика маркази иш бошлади.

Фото: М.Қодиров

Марказ очилиши муносабати билан ўтказилган тадбирда мамлакатимизда аҳоли саломатлигини мустаҳкамлаш, тиббий хизмат кўрсатиш сифати ва самарадорлигини янада яхшилашга устувор аҳамият қаратилаётгани таъкидланди.

Мамлакатимизда кейинги йилларда соғлиқни сақлаш соҳасида бозор иқтисодиёти муносабатларини татбиқ этиш асосида нодавлат даволаш муассасаларини ривожлантиришга алоҳида эътибор қаратилмоқда.

Фото: М.Қодиров

Президентимизнинг 2017 йил 1 апрелдаги “Соғлиқни сақлаш соҳасида хусусий секторни янада ривожлантириш чора-тадбирлари тўғрисида” ги қарори бу борада муҳим дастуриламал бўлаётир. Ушбу ҳужжатга мувофиқ хусусий тиббиёт муассасалари шуғуланиши мумкин бўлган тиббий ихтисосликлар 50 тадан 126 тага кўпайтирилди. Хусусий клиникаларга давлат томонидан қатор молиявий имтиёзлар берилмоқда.   Бундан ташқари, лицензия олиш учун берилган аризани кўриб чиқиш муддати 30 кундан 20 кунга қисқартирилди, лицензия олиш учун тўланадиган давлат божи энг кам иш ҳақининг 10 баробаридан  5 баробаригача камайтирилди. Бу каби имтиёз ва имкониятлар энг чекка ҳудудларда ҳам хусусий тиббиёт муассасаларини ривожлантиришга, тиббий хизмат кўрсатиш сифати янада яхшиланишига хизмат қилади.

Мазкур мажмуа қурилишига 2,2 миллиард сўм ва 156 минг доллар  маблағ сарфланди. Бу ерда 41 та стационар даволаниш  хонаси  бўлиб, болалар неврологияси, гастроэнтерология, ички касалликлар ва бошқа хасталикларни аниқлаш, сифатли ташхис қўйиш, даволаш учун барча замонавий моддий-техник имкониятлар етарли.

Фото: М.Қодиров

— Марказимиз энг замонавий русумдаги тиббий жиҳозлар билан таъминланган, дейди —  “Med doctor Arslonov” масъулияти чекланган жамияти раҳбари Зафаржон Асқаров.- Шифокорларнинг барчаси олий тоифали, аксарияти хориждаги даволаш  муассасаларида малака оширган. Марказда 21 киши иш билан таъминланди. Шуни ҳам таъкидлаш жоизки, хусусий тиббиёт муассасаларига четдан олиб келинадиган  янги тиббий асбоб-ускуналар учун божхона имтиёзлари берилгани айни муддао бўлди. Яратилаётган бундай шариотлар хусусий тиббиёт муассасаларининг моддий-техник  базасини янада мустағкамлаш имконини бераётир.

М.СУЛАЙМОНОВ

 

Бошқа тезкор хабарларни Телеграм каналимизда кузатиб боринг: @fargonashifokori

Дўстларингизга улашинг