Тиш қонаб, безовта қилса…

«Тишим тез-тез қонаб туради.  Айниқса, тиш тозалаётганимда. Бу ҳолатнинг сабаби нима? Қандай бартараф этиш мумкин?»

Рамазон ҲАЙИТАЛИЕВ.

— Ҳар қандай сурункали касалликлар, шу жумладан, пародонтит ҳам баҳор ва куз ойларида ўткирлашиши (кучайиши) мумкин. Шунинг учун ҳам тишни профессионал даражада тозалаш учун стоматолог ҳузурига бориб туринг. Бу милк муаммоларини бартараф қилишнинг энг самарали усулидир. Тишнинг доимий қонаши ва касалликларига тишдаги тошлар — қаттиқ қолдиқлар ҳам сабаб бўлади. Улар асосан тишнинг сиртида ва милк остида жойлашган бўлади.

Баъзан беморлар тошларни юмшоқ мато билан артишга ҳаракат қилишади. Бу эса нохуш ҳолатларни юзага келтириши мумкин. Тишдаги тошларни мустақил равишда тозалаш мумкин эмас. Энг яхши тиш чўткаси ҳам мукаммал равишда тозалаш хусусиятига эга эмас.

Тишларни профессионал равишда тозалаш ультратовуш ёрдамида амалга оширилади. Дастлаб ультратовуш тўлқини тишдаги тошлардан халос қилса, сўнгра уни қаттиқ элементлардан тозалайди ва мусаффолик беради. Кейин алоҳида суюқлик — сув, ҳаво, сода босими тишлардаги қолган майда тошларни йўқ қилади.

Тиш шифокори сизнинг ҳолатингизни кўргач, махсус даволовчи тиш пасталари буюриши ҳам мумкин.

Жаҳонгир ҲАСАНОВ,

шифокор-стоматолог

Шифо-инфо

Дўстларингизга улашинг: