Умр керакмасми? Ичинг ва чекинг!

“Шу ҳам тавсия бўлдию!” деяпсизми? Тўғри, кинояли сарлавҳа. Лекин зарар эканлигини била туриб, нафсини ичкилик ва тамакидан тия олмайдиганларга яна нима дейиш мумкин?
Ўзига тўқроқ, чўнтаги қаппайганлар қимматроқ ароққа ёпишади, тамакининг шоҳонасини тутатади. Маошини маошига етказолмайдиганлар эса арзонроғи ҳам бўлаверади, деб қўлболасига осилади. Лекин ҳаммаси бир гўр эмасми?! Энг қимматбаҳо неъмат ҳисобланган соғликка путур етаверади, ички органлар мажруҳланаверади, умр эса қисқараверади…

Ғарб мамлакатларидан бирининг президенти сигарета чекавериб, бир ўпкасидан жудо бўлгани ҳақида хабар ўқиб қолдим. Ўпкасидан қуруқ қолгач у ишхоналарда сигарета чекишни тақиқлаш, чекувчи талабаларга стипендия тўламаслик ҳақида фармон чиқаради. Бош деворга урилганидан кейин шу-да…

Биласизми, кашандаларнинг бошқалардан “устунлик” жиҳатлари ҳам бўлади:

  • уйига ўғри кирмайди, чунки кечаси билан йўталиб чиқади;
  • ит қопмайди, боиси қўлда ҳасса билан юради;
  • ҳеч қаримайди, чунки ёшлигидаёқ нариги дунёга йўл олади.

Алкогол мухлислари эса:

  • ширакайф бўлганида товусдек товлана бошлайди;
  • биринчи шишанинг ортидан иккинчиси кела бошлагач маймунга ўхшаб қилиқ кўрсата бошлайди;
  • хурмачаси тўлгач эса тўнғизга ўхшаб ерга ағана бошлайди.

Мана шунақа инсонлар нафсининг тизгинини қўлда маҳкам ушлаганларида эди, қанчадан-қанча пул оиланинг кийим-кечаги, болаларнинг ўқишига сарфланган бўларди…

Манба: ШИФО — ИНФО

Дўстларингизга улашинг: