Соғлиқни сақлаш вазирлиги ҳафтанинг ҳар пайшанба кунини “Соғлом овқатланиш куни” деб белгилади

Соғлом овқатланиш инсон саломатлигини мустаҳкамлаб, узоқ умр кечиришини таъминловчи муҳим мезондир. Айниқса, шиддат билан ривожланаётган бугунги глобаллашув даврида бу тушунчанинг аҳамияти тобора ортиб бормоқда. Аҳолининг тўғри овқатланиш меъёрларига эътибор бермаслиги туфайли айрим тиббий-ижтимоий муаммолар юзага келмоқда. Жумладан, нотўғри овқатланиш натижасида ортиқча вазн муаммоси авж олиб, турли хасталикларга олиб келмоқда. Мамлакатимизда долзарб масалаларни ҳаётга татбиқ этиш, аҳолининг саломатлигини муҳофазалаш, сифатли озиқ-овқат маҳсулотларини ишлаб чиқариш, бу жараёнда хавфсизликни таъминлаш масаласига ҳам аҳамият қаратилмоқда.

«2015-2020 йиллар даврида Ўзбекистон Республикаси ахолисининг соғлом овқатланишини таъминлаш концепциясини ва чора-тадбирлар комплексини тасдиқлаш тўғрисида»ги қарорларини амалга ошириш ҳамда республикада соғлом овқатланишни кенг тарғиб этиш, диетология хизматини такомиллаштириш мақсадида Ўзбекистон Республикаси Соғлиқни сақлаш вазирлиги хафтанинг ҳар пайшанба кунини “Соғлом овқатланиш куни” деб белгилади.

Бугунги кунда дунё миқёсида нотўғри овқатланиш натижасида касалликлар сони ортиб бораётганлиги соҳа мутахассисларини ташвишга солмоқда. Бу нафақат ривожланган, балки ривожланаётган давлатлар, жумладан, Ўрта Осиё мамлакатларини ҳам четлаб ўтаётгани йўқ. Шундай экан, соғлом овқатланишнинг бир неча турлари, асосан, муҳим микроэлементларнинг етишмаслиги бир томонлама муаммо бўлса, иккинчиси тана вазнининг ортишидир. Бу айниқса, иқтисодий ривожланаётган мамлакатларда яққол кўзга ташланади. Ўзбекистон Республикасида соғлом овқатланиш муаммосига урғу берилиши, бу борадаги миллий дастурнинг амалиётга татбиқ қилиниши ҳамда Тошкент тиббиёт академияси ҳузурида диетология ўқув-илмий марказининг ташкил этилиши аҳоли саломатлигини мустаҳкамлашдаги яна бир муҳим қадамдир.

Инсоннинг фаол ҳаёт кечириши, унинг соғлом бўлиши, узоқ умр кўриши, касалликларга чалинмаслиги албатта, тўғри овқатланишига боғлиқ. Ҳатто бетоб бўлганда ҳам махсус диетатерапия, парҳез таомномалар тузилади. Илмий ёндашган ҳолда аҳоли, беморларга янги технология асосида маҳаллий диеталарни яратган тарзда татбиқ этиш лозим. Кўпчилик диетология фақатгина тиббиёт ходимининг хизмати, деб ўйлайди, лекин ундай эмас, у барчамизнинг диққатимизни тортиши лозим. Баъзан шифокор томонидан беморга турли дори воситалари ёзилади, унинг эвазига табиий, яъни озиқ-овқат билан даволаш ҳар томонлама қулай. Ҳар бир касалликка индивидуал ва илмий ҳолда ёндашиб, тақчил, миллий таомларни тавсия қилиш фойдадан ҳоли бўлмайди. Аҳоли соғлом турмуш тарзининг асоси сифатида тўғри овқатланишга доир кенг тушунтириш олиб бориш, тўғри овқатланиш масалалари бўйича таълим дастурларини ишлаб чиқишга оид амалий чора-тадбирлар кўрилмоқда.

Дўстларингизга улашинг: